Ik kavi ki kalpana me,
panktiyon ki shrankhala sang,
chulbule dhaagon ki potli se jhaankte
nayi nayi kahaniyon ke khul rahe pitaare hain,
sapno ki duniya ke adbhut nazaare hain..

bade bade pankh laga kar,
machliyan hawa me jhoomti hain,
titliyan bhi lehron sang uchalatin hain,
raat saat rangon ki syaahi se dhul gayi hai,
aus ki boondon me jaise mishri si ghul gayi hai,
suraj aur chaand sang sang ghoomte hain,
peekar sharbat raseela masti me jhoomte hain,
yahin to gungunate jhilmilate sitaare hain,
sapno ki duniya ke adbhut nazaare hain..

samander ki baahon me,
nadiya ki dhaara ka aanchal lehrata hai,
bhanwaron toofano se madhur sangeet aata hai,
kishtiyan bhi jahan dhwani veg se bhaagtin hain,
kshitiz ki seemayon ko palak jhapakte laanghti hain,
taapuon ke beech me taerte pathron ke pul bane hain,
neele neele paaniyon se saaton mahadweep dhul rahe hain,
lehron ki taal par thumkate machiyaron ke sureele gaane,
munge aur motiyon ke un pea koi luta raha hai khazane,
shankh aur sippiyon se bhare hue kinaare hain,
sapno ki duniya ke adbhut nazaare hain..

amber ki god se,
kheer pooyon ke pahad liye chalti hain baadlon ki toliyan,
jhar jhar barasti hai meethi chatpati goliyan,
phoolon ke pankhon ke rath par swaar hawa aati hai,
patjhar me bhi yahan bhini si khusbu chati hai,
jaadu tamashon ke ajab khel chalte hain,
paani ke tel se bhi jagmag diye jalte hain,
dharti se aakash tak sidiyan lagi huin hain,
antriksh ke har chor se doriyan bandhi huin hain,
aakaas ganga ke mandap me taaron ki ho rahin hain shaadiyan,
ulka pind kar rahe hain roshni ki aatishbaajiyan,
paedo aur panchiyon sang khelti baharen hain,
sapno ki duniya ke adbhut nazaare hain..

kalam ki nok se,
nikal rahe hain shabdon ke sumehri jhund,
panno par chap jate hain man ke hazaaron pratibimb,
kahkahon umando se muskurata hai har par,
gungunati hai kavitaayen naachati hain gazhal,
yahin ke gakleehcon par gujrata hai tamanayon ka kaafila,
meel ke pathar hi banate hain haqiqat ka raasta,
isi se hi to chalti dhadkan ki pehchaan hai,
nahi to bhujh gaye shareer me rengti hui jaan hai,
jo parvaton ke jahaaz se bekhauf begte hain,
un kalpanayon ke jharno ke sang hi rahin sada,
jahan sukh dukh ke beech na koi deewaren hain,
maano to koi nahi mano to apne saare hain,
sapno ki duniya ke adbhut nazaare hain...