prem ki bhar bhar kar pichkari,
chala rahi vo rangon ki dhaari,
nayano se karti vo atkheli,
hansi ki pudiya hawa me udele,
kab aayegi meri baari,
chidha rahi ye kudrat saari,
bharne ko fir se bahaaron se jholi,
khelengi meri sajni se holi..

hawayen lagin masti mein jhoomne,
ghatayen lagin dharti ko chomne,
nadiyan seekh rahin khil khilane,
jharno ko chali hai duniya dikhane,
dil me hazaaron khawaishon ko bhar kar,
chal padi baadlon ki kishtiyan bhi,
bharne ko fir se boondon se jholi,
khelengi meri sajni se holi...

inder dhanush ke rang hain bade niraale,
uske haathon me saj gaye matwale,
chura kar abeer gulaal ki umangon ko,
ghol deti hai vo samander me rangon ko,
bandergahen hairaan ho gayin hain,
lehren bhi preshaan ho gayin hain,
bharne ko fir se shankh sippiyon se jholi,
khelengi meri sajni se holi..

chaman ne bhi apne kapde badle,
har daali ki rangeen hain shaklen,
chipkar baithe hain bhanwaron ke jhund bhi,
tumhare haathon se sharbat peene ko,
titliyon ke pankh laga kar,
chal padi hain phoolon ki toliyan bhi,
bharne ko fir se surkh rangon se jholi,
khelengi meri sajni se holi..

main bhi ab tyaar ho jaaun,
gulaab se ras udhaar le aaun,
peele neele laal hare gulaabi,
uske rangon se man ho gaya sharabi,
saari kaynaat door hat jaaye,
sabse pehle meri hi baari aaye,
raasta de do meri tamanyon ko pehle,
bahrne ko athaah prem se jholi,
khelengi meri sajni se holi..